БЕОҐРАД – Понеже у двох явних поволанкох нє було заинтересованих за купованє Новинскей аґенциї Танюґ, Влада Сербиї вчера принєсла одлуку о гашеню того медию у державней власносци, а заняти достаню одпремнїни у складзе з Програму за ришованє звишку занятих у процесу приватизациї. Маєток Танюґу пребера Дирекция за маєток, а арихиву Державна архива.
Одлука о гашеню єдного з найзначнєйших медийох на нашим просторе принєшена дзень пред тим як Танюґ мал означиц 72 роки снованя.
Телеґрафска аґенция новей Югославиї – Танюґ – основана 5. новембра 1943. року, под час Другей шветовей войни, пре ширенє спознаня о антифашистичней борби и народноошлєбодительним руху у тедишнєй Югославиї.
Од 1992. року була новинска аґенция Союзней Републики Югославиї, од 2003. року аґенция Державней Заєднїци Сербиї и Чарней Гори, а од 2006. року по вчера була национална Новинска аґенция Републики Сербиї.
Новинска аґенция Танюґ пласовала найвецей информациї у Сербиї и тим реґионє, єй информациї ше тримало за точни и довирлїви и найвецей су преношени и цитировани у шицких медийох, а ґенерациї у бувших державних на тим просторе висросли з познатим мотом: „Як явя Танюґ…”