Шветова здравствена орґанизация (ШЗО) пред даскельома роками виглєдовала о осаменосци модерного чловека, а анализа указала, на радосц корпоративних медийох, же осаменосц „забива” 100 людзох на годзину. Статистика котра вигодна спомнутим медийом и число препатрункох котри приноша профит, и траґична за нас, за модерни час и модерного чловека.
Часц траґедиї и же зме на таку можлївосц спозорени пред 182 роками у економским тексту Карла Маркса зоз толкованьом же капитализем оцудзує чловека од средствох за роботу, продукцийного процесу, од своєй сущносци и других людзох. Скоро 100 роки познєйше Ерих Фром уж цалком видзел и повторел спозоренє у своєй роботи „Сцеканє од шлєбоди”. Менєй од два децениї после Фрома, Дейвид Рисман пише „Осамена громада”. Ту и Херберт Маркузе котри 14 роки после Рисмана написал „Чловек єдней димензиї” цо свойофайтове законченє – уж зме сцигли по осаменосц, пре оцудзенє, цалком. И требало кус вецей як пол вика же бизме од економскей анализи, прейґ психолоґийней и социолоґийней, сцигли по припознанє ШЗО, и поражуюци факти. Така капиталистична економия, таке трошительне дружтво, таки розкош шицкого – забива 100 людзох кажду годзину.
Нїґда нас нє було вецей на планети, и нїґда нє могло швидше як нєшка сцигнуц до милиярди людзох… И тота гужва шицкого, людзох, дириґованих одношеньох и на роботним месце и у шлєбодним чаше (шлєбодни час ше єднак дириґує як и роботни час – мушице буц здрави и щешлїви, мушице буц красни, мушице випатрац млади, мушице знац бредни и тренди), нас забива.
Вшелїяк, капитализем забива масовнєйше зоз нєможлївима роботнима годзинами и роботнима вимогами, през класну войну, през забаву и шлєбодни час, през нашу интиму, за котру думаме же маме. Нє маме, анї кус.
Постої якаш мала правда у припознаню ШЗО же осаменосц ґлобални проблем явного здравства. Постої и мала правда у тим факту, а обчекована зоз причину (младши людзе у нєрозвитих жемох зоз нїзшима приходами и образованьом, тинейджере зависни од дружтвених мрежох, як и припаднїки рижних меншинских ґрупох).
Тото цо найменєй иритантне, же зме спозорени. Пред скоро 200 роками. И пред скоро 100 роками, та и на кажду децению, практично.
Оцудзенє уткане у капиталистичней привреди, осаменосц єден зоз єй лоґичних пошлїдкох. ШЗО вимага од державох же би тот прегляд уведли до своєй явней политики, осаменосц нє проблем индивидуи, алє дружтва. Политика направи явни стратеґиї, и имплементациї. Економия, така, капиталистична, предлужи забивац.
Становиска висловени у тим тексту виключно авторово и нє вше одражую ушорйовацку политику новинох „Руске слово”.