15. ЮНИЙ – На нєшкайши дзень вишло перше число новинох на руским язику Руске слово.
1886. – Народзени Гавриїл Костельник Гомзов (Руски Керестур, 15. юний 1886 – Львов, 20. септембер 1948), зачатнїк уметнїцкей литератури Руснацох и автор першей ґраматики руского язика, грекокатолїцки священїк, доктор филозофиї. Основну школу закончел у родним месце, ґимназию у Винковцох и Заґребе, 1906. року уписує ше на Теолоґийни факултет у Заґребе, а студиї богословиї закончує у Львове 1911. року. Постдипломни студиї закончел у Фрайбурґу у Швайцарскей дзе 1913. року докторовал. Писал литературни твори и науково розправи. Обявени му Идилски венєц „З мойого валала” (1904), Граматика бачваньско-рускей бешеди (1923), руска драма „Єфтайова дзивка” (1924)… Бул настоятель церкви Преображеня Господнього у Львове, дзе 1946. предшедал зоз Львовским церковним собором котри утаргнул Грекокатолїцку церкву. Погинул у атентату 20. септембра 1948. року, кед ше врацал дому зоз служби.
1945 – Вишло перше число новинох на руским язику Руске слово. У першей редакцийней ґрупи тижньових новинох були: Штефан Чакан, Евґений Планчак, Евґений Джуня, Яша Баков и Гавриїл Надь. Новини обявел Културно-просвитни совит у Руским Керестуре, на штирох бокох, зоз фотоґрафию предсидателя ФНРЮ Йосипа Броза Тита на насловним боку, а нарис заглавя з меном Руске слово виробел Иван Болдижар з Нового Саду. Тираж новинох перше бул 800, а додруковане ище 270 прикладнїки. Тот дзень ше кажди рок означує як Дзень Новинско-видавательней установи Руске слово.
Шветови дзень витру, означує ше од 2007. року. Дзень пошвецени виглєдованю витра, його моци и розличних можлївосцох. Витор єдна зоз алтернативних еколоґийних енерґийох будучносци.
Нєшка и Шветови дзень поживи.