ВЕЛС (АВСТРИЯ) – У варощику Велс у горнєй Австриї, всоботу, 13. юния, зишли ше на треци сход Руснаци з Австриї, Нємецкей и Словацкей.
Тогорочни сход орґанизовани у дворе младих Керестурсцох Антония Колошняя и Дениса Надя, а у орґанизованю участвовали шицки Руснаци хтори жию у Велсу и як за Рутенпрес доявела Александра Шомберґ, дзивоцке Надь, у тей хвильки их єст дзешецеро.
На поволанку ше одволали и на сход пришли Фейдийово з Минхену, Єлена Дропиц з дзивчатми зоз Салцбурґу и Регаково и Бодвайово з Братислави. Госци сцигли предполадньом, та им за фриштик понукнути капущанїки, а потим главни майстор за роштиль бул Антоний Колошняї. На столє було и колача цо напекли руски кресцанки, а кажде дацо принєсол за наздравянє, и красна хвиля их потримала, та було бешеди аж и до пол ноци.
Ютре, после фриштику, орґанизовали кратки вилєт на водопад нєдалєко од Велсу. А як гваря крашнє було и на тим трецим сходу, бешедовали о тим цо ше кому послучовало од прешлого року, евоковали памятки з младосци и прешлих часох, слухали руски шпиванки и розишли ше шицки полни з краснима упечатками и наздаваньом же ше увидза ознова и скорей як орґанизую шлїдуюци сход у Велсу.