РУСКИ КЕРЕСТУР – Вчера, 14. юния у Катедралней церкви св. оца Миколая у Служби Божей на 11:30 годзин, 27-еро школяре другей класи прияли першу Святу причасц.
Дзень пред тим, першопричашнїки вєдно зоз своїма родичами и найблїзшима ше споведали, а парох керестурски о. Владислав Варґа их символично випитовал о тим цо научели през тоти мешаци пририхтованя за тот окремни дзень.
Службу служели, и дзень пред тим споведали, о. Владимир Медєши, o. Ярослав Варґа и о. Владислав Варґа. На служби зоз дзецми радосц того велького збуваня подзелєли и їх родичи и родзина, вироучительки ш. Франциска Цупер, и ш. Емануїла Кинджерска, вироучителька зоз школи Златка Малацко, як и учительки у школи Сандра Человски и Ясминка Сабадош.
После законченя Служби Божей першопричашнїки у процесиї предводзени з младима котри ношели крижи, членами Церковного одбору, священїками, шестрами Служебнїцами и присутнима, почали обход коло храму и руцанє „святу”.
После благослову священїка пред уходом шицки ше вєдно врацели назад до церкви, дзе першопричашнїки як памятку на тот дзень достали дипломи и пацерки, а потим шлїдзело фотоґрафованє. На концу, першопричашнїки зоз ш. Франциску Цупер пририхтали пригодну програмку на хторей шпивали и рецитовали.
