СРИМСКИ КАРЛОВЦИ – Штернацецеро школяре пиятей, шестей и седмей класи, Школи Петро Кузмяк з Руского Керестура, у провадзеню своїх еко-наставнїцох, штварток, 11. юния, нащивели Сримски Карловци.
Нащива реализована у рамикох проєкту За чистейши и желєнши школи у Войводини по хторим керестурска школа була єдна з наградзених, а нагоду одпутовац мали вредни школяре хтори того року участвовали на окружним, або висшим ступню змаганя.
Вилєт орґанизовал Рух горякох Войводини у Сримских Карловцох и Специялни резерват природи Ковильско-петроварадински мочар.
Школяре поопатрали знаменїтосци Сримских Карловцох, вожели ше на катамарану, участвовали у рижних интересантних роботньох у природи хтори були отримани на побрежю Дуная, а хтори промовую защиту животного штредку.
Школярох на наградни вилєт водзели їх еко-наставнїци Валентина Русковски и Паулина Рац, а керестурски школяре на вилєт пошли вєдно зоз своїма парняками зоз Школи 20. октобер зоз Сивцу.
