23. ЮНИЙ – На нєшкайши дзень oсновани Медзинародни олимпийски комитет.
1894 – Основани Медзинародни олимпийски комитет, МОК (International Olympic Committee, IOC), медзинародна спортска орґанизация зоз шедзиском у Швайцарскей и Лозани. МОК основал Пєр де Кубертен вєдно зоз Деметриосом Викеласом як першим предсидательом, а идея була ожиц спортски змаганя яки були у старей Греческей. МОК орґанизує Лєтни олимпийски бависка кажди штварти рок, а I Олимпийски бависка отримани у Атини 1896. року, и Жимски олимпийски бависка тиж кажди штварти рок, а перши отримани у французким Шамонию 1924. року. Тиж орґанизує и Олимпийски бависка младих – перши лєтни отримани у Синґапуру 2010. року, а перши жимски у Индзбруку 2012. року.
1912 – Народзел ше Алан Матисон Тюринґ (Лондон, 23. юний 1912 – Чешир, 7. юний 1954), анґлийски матемаричар, лоґичар и криптолоґ. Направел концепт алґоритмох яки ше и нєшка хаснує у рахункарстве. У Другей шветовей войни розвил вецей технїки за розбиванє шифрох и методу хтора могла одкриц поставки електромеханїчней машини – Ениґми (машина за шифроване радио-телеґрафских порученьох).
Дзень явного сервиса Зєдинєних нацийох.
Медзинародни олимпийски дзень.