СЕРБИЯ – Преход з аналоґного на диґитални сиґнал у Сербиї будзе закончени на час, по 15. юний, алє ше меня термини гашеня аналоґних сервисох. Место у трох, як було предвидзене, аналоґни сиґнал ше будзе гашиц у шейсц терминох.
Аналоґни сервис перше будзе загашени у Войводини – у Вершцу будзе претаргнути 30. марца, у зони Суботица – Зомбор и Кикинди 27. априла, а у зони Чот – Венац 18. мая.
Державна секретарка у Министерстве тарґовини, туризму и телекомуникацийох Татяна Матич гварела же 93 одсто жительства Сербиї уж ма диґитални сиґнал, а по конєц юния го будзе мац 95 одсто.
Термин за придаванє документациї бул 1. фебруар, алє є предлужени, так же ше гражданє ище вше можу приявиц за доставанє безплатних сет-топ боксох.
Як цо уж на вецей заводи наглашоване, опрему за диґитални сиґнал нє треба же би набавяли гражданє котри уж маю диґиталну телевизию, сателитску антену и ИП-ТВ, алє лєм гевти котри патра телевизию прейґ хижних и антенох на закрицох.