17. МАРЕЦ – На нєшкайши дзень подписани Бриселски контракт.
1834 – Народзел ше инженєр Ґотлиб Вилхелм Даймлер (Шорндорф, Нємецка, 17. марец 1834 – Бад Канштат, 6. марец 1900), котри конструовал перши автомобилски бензински мотор. Основал 1890. року компанию Даймлер-Моторен-Ґезелшафт, хтора ше зєдинєла зоз фабрику Карла Бенца до компаниї Даймлер-Бенц, хтора продукує авта Мерцедес.
1901 – У Паризу отворена вистава 71 слика Винсента ван Ґоґа и направела праву сензацию 11 роки после уметнїковей шмерци.
1938 – Народзени балетан Рудолф Хаметович Нуреєв (Иркутск, СССР, 17. марец 1938 – Левалоа Пере, Французка, 6. януар 1993), єдна з найвекших гвиздох шветовей балетней сцени XX вику.
1948 – Подписани Бриселски контракт медзи Зєдинєним Кральовством, Французку и жемами Бенелукса (Белґия, Голандия и Луксембурґ) о снованю Заходноевропскей униї.
2015 –У манастире святого Илдефонса у Мадриду, идентификовани посмертни остатки шпанского писателя Миґуела Сервантеса, хтори ше упокоєл у априлу 1616. року. Сервантесов Дон Кихот єдно з найзначнєйших дїлох шветовей литератури.
2020 – Европска уния заварла свойо гранїци на 30 днї же би ше нє ширело корона вирус. Мири забрани уходу до ЕУ нє одношели ше на державянох Швайцарскей, Лихтенштайну, Велькей Британиї и Норвежскей.