3. ДЕЦЕМБЕР – На нєшкайши дзень народзел ше Юлиян Пап.
1851 – Основана Грекокатолїцка парохия у Бачинцох. Перши священїк бул Янко Санич (1820–1877), хтори пред тим бул учитель у Руским Керестуре.
1883. року народзени австрийски композитор Антон Фридрих Ернст фон Веберн, єден з найвизначнєйших експресионистох, чию музику забранєли нацисти у Другей шветовей войни.
1943 – Народзел ше дипломовани инженєр, новинар, публициста, просвитни роботнїк и польопривредни фаховец Юлиян Пап (Руски Керестур, 3. децембер 1943 – Нови Сад, 2. септембер 2022). По законченей основней школи у Руским Керестуре и Кули, стредню польопривредну школу закончел у Зомборе и Футоґу. Польопривредни факултет и студиї анґлийского язика Юлиян Пап закончел у Новим Садзе. Робиц почал як наставнїк анґлийского язика у ОШ Петро Кузмяк у Руским Керестуре, алє пошвидко преходзи на длужносц новинара до Редакциї новинох Руске слово, дзе бул єден час и заменїк главного и одвичательного редактора, а сотрудзовал и у часопису Добро јутро. Прешол на роботу до Вивершней ради САП Войводини, а отамаль до Покраїнскей конференциї ССРН Войводини, та до Союзней конференциї ССРН Югославиї. Пошол до инвалидней пензиї 1991. року. Писал прилоги з рижних обласцох за скоро шицки руски виданя и емисиї Радио Нового Саду на руским язику. Бул член Дружтва за руски язик, литературу и културу. Достал Награду за приповедку дзецинского часопису „Заградка“ (2011), як и Награду часопису „Шветлосц“ за есеї и преклади зоз шветовей литератури (2014). З нагоди 75-рочнїци НВУ „Руске слово“ достал награду за литературу за дзеци „Михайло Ковач” (2020). Обявени му 9 кнїжки. Юлиян Пап поховани 4. септембра, на керестурским теметове.
1948. року народзени Джон Майкл Озборн, познати як Ози Озборн (Ворикшир, Зєдинєне Кральовство, 3. децембер 1948 – Бакинґамшир, Зєдинєне Кральовство, 22. юлий 2025), шпивач анґлийскей геви метал ґрупи Блек Сабат.
Нєшка Медзинародни дзень особох з инвалидитетом. Ґенерална скупштина Зєдинєних нацийох усвоєла резолуцию 1992. року зоз цильом же би ше и особом зоз инвалидитетом оможлївело витворйованє людских правох.
Нєшка и Шветови дзень борби процив ловох.