4. МАРЕЦ – На нєшкайши дзень народзели ше наставнїк музики Юлин Бучко и професор Евґениє Медєши Генц.
1678 – Народзел ше виолински виртуоз Антонио Вивалди (Венеция, Италия, 4. марец 1678 – Беч, Австрия, 28. юлий 1741) бул италиянски священїк и композитор з периоду барока, а його музициранє одушевйовало сучаснїкох зоз позарядову технїку и импровизацию.
1877 – Емил Берлинер видумал микрофон.
1945 – У Беоґрадзе основане спортске здруженє Червена гвизда.
1958 – Народзел ше Юлин Бучко (Миклошевци, Горватска 4. марец 1958 – Вуковар, 13. фебруар 2011), наставнїк у музичней школи, музични редактор у радию, роботнїк у култури и композитор. Юлин Бучко закончел основну школу у Миклошевцох, а штредню польопривредну закончел у Илоку. Любов ґу музики була моцна, та ше уписал до Висшей музичней школи у Осєку. Робел як наставнїк музики у музичней школи при Културним центру у Вуковаре. Компоновал на тексти Дюри Папгаргая и на тексти своєй шестри Агнети Бучко-Папгаргаї, а опробовал ше и на текстох Мирона Колошняя и Олени Фейса, композициї виводзени на наших руских фестивалох. Умар у Вуковаре 13. фебруара, а поховани є 15. фебруара 2011. року у Миклошевцох.
1951 – Народзел ше професор Евґениє Медєши Генц (Руски Керестур, 4. марец 1951 – Руски Керестур, 28. марец 2025). Основне образованє Евґениє Медєши закончел у Руским Керестуре, а ходзел до Ґимназиї Йован Йованович Змай у Новим Садзе, физику дипломовал на Природно-математичним факултету у Новим Садзе. Робиц почал у Кули, а потим у Школи „Петро Кузмяк” у Керестуре, дзе робел по пензионованє. У настави хасновал сучасни наставни средства, бул инициятор и длугорочни реализатор школского сайту и школского часопису Тайм аут, водзел секцию астрономиї, а прекладал и учебнїки з физики и иформатики. Професор Генц ище на студийох бул часц редакциї емисиї за младих Радио Нового Саду Одгуки з ровнїни, бул познати и як добри спортиста, бавяч ФК Русин а тиж и ватерполиста. З нагоди 250-рочнїци приселєня Руснацох до тих крайох бул инициятор и учашнїк бициґлистичного подяца По драги наших предкох, з Керестура до Медзилаборцох у Словацкей. Як активни член Еколоґийного руху у валалє Желєни персцень участвовал у велїх його проєктох, и бул єден з иницияторох снованя Туристичного здруженя Руски Керестур. Потримал роботу на Рускей википедиї, дзе и сам вредно робел у тиму ентузиястох. Професор Евґениє Медєши Генц упокоєл ше 28. марца 2025. року, поховани є 29. марца на керестурским теметове.