7. ОКТОБЕР – На нєшкайши дзень nародзел ше владика Авґустин Горняк.
1806 – Ралф Ведживуд патентовал индиґо.
1885 – Народзел ше атомски физичар Нилс Генрик Давид Бор (Копенгаґен, Данска, 7. октобер 1885 – Копенгаґен, 18. новембер 1962), добитнїк Нобеловей награди за физику 1922. року, поставел теорию структури атома, потолковал шветлосни спектри атома водонїка и у Другей шветовей войни участвовал у ЗАД у виглєдованьох хтори предходзели виробку атомскей бомби. Велї поняца у атомскей физики наволани по нїм.
1914 – Народзел ше писатель Михайло Лалич (Трепча, Чарна Гора, 7. октобер 1914 – Беоґрад, 30. децембер 1992), бул член Сербскей и Чарногорскей академиї наукох и уметносцох.
1919 – Народзел ше владика кир Авґустин Горняк (Коцур, 7. октобер 1919 – Лондон, 16. новембер 2003). На кресценю достал мено Евґен. Основну школу закончел у Коцуре, ґимназию у Вербаше и Славонскей Пожеги. Богословски студиї започал у Загребе 1939. року, а предлужел у Риме. По законченю богословиї студирал и церковне право, та 1947. року здобул титулу доктора канонского права. Душпастирску длужносц почал у Зєдинєних Америцких Державох. У Питсбурґу як професор викладал моралну теолоґию и канонске право. У Мондери (Канада) 1956. року вошол до василиянского чину (ЧСВВ) и постал єромонах. Теди му по правилох Чина пременєне мено, место Евґен постал Авґустин Горняк. Од 1963. року бул самостойни еґзарх за Українцох грекокатолїкох у Велькей Британиї. Пензионовал ше 1987. року, умар у Лондону 16. новембра 2003. року, поховани є у парохиялней церкви у Коцуре.
2000 – Воїслав Коштуница преглашени за предсидателя Союзней Републики Югославиї после побиди на предсидательних виберанкох 24. септембра.
2000 – Словенски скияш Даво Карничар постал перши чловек хторому ше удало спущиц ше на скийох зоз найвисшей гори на швеце, Монт Евереста.