9. ДЕЦЕМБЕР – На нєшкайши дзень народзел ше Яша Баков.
1608 – Народзел ше писатель Джон Милтон (Лондон, 9. децембер 1608 – Лондон, 8. новембер 1674), бул есеїста, поета и драматичар.
1905 – У Французкей озаконєне одвойованє держави и церкви.
1906 – Народзел ше атлетски репрезентативец, спортски тренер, професор, полиґлота, поета Йоаким Яша Баков (Дюрдьов, 9. децембер1906 – Нови Сад, 21. октобер 1974). Основну школу закончел у Дюрдьове, до ґимназиї ходзел у Зренянину и Новим Садзе. Дипломовал 1934. року на ґрупи югославянска литература, сербскогорватски и французку язик на Филозофским факултету у Беоґрадзе. Робел у Славонскей Пожеґи, Копривници, Зомборе, Новим Садзе, а од 1945. року у нїзшей ґимназиї у Руским Керестуре. Бул полиглота, бешедовал и писал на штернац язикох, а ище даскелї хасновал у бешедней форми. Од 1949. року Яша Баков робел як атлетски тренер у Новим Садзе, Сараєве, Панчеве, Беоґрадзе, а тренерску кариєру закончел у Новим Садзе 1971. року кед пошол до пензиї. Яша Баков бул три раз шампион Югославиї у скоку зоз палїцу: Удине 1935 (3,60 м.), Лєтни олимпийски бависка, Берлин 1936 (3,70 м.) и Целє 1937 (3,75 м.). З його меном од 1992. року отримую ше Спортски бависка Яша Баков, а йому на чесц у Дюрдьове опрез Рускей школи 8. децембра 2019. року шветочно одкрита його биста. Йоаким Яша Баков умар у Новим Садзе, а поховани є 23. октобра 1974. року на новосадским теметове.
1916 – Народзел ше филмски ґлумец, редитель и продуцент Ишур Дамиєлович Демски, познати як Кирк Даґлас (Нюйорк, ЗАД, 9. децембер 1916 – Беверли Гилс, ЗАД, 5. фебруар 2020).
1985 – Ґенерална скупштина Зєдинєних нацийох єдногласно прилапела резолуцию з хтору шицки дїї тероризма осудзени як криминал.
2021 – НВУ Руске слово видало сликовнїцу и вифарбйованку Кухня за дзеци од 3 по 10 роки. Сликовнїцу провадзи поучни и франтовлїви писньочки. Илустрациї сликовнїци и вифарбйованки креирала Мария Ковачевич, а у кнїжочки представени руски традицийни єдла и поняца хтори вязани за кухню. Цали тираж сликовнїци и вифарбйованки „Кухня” розпредати за 27 днї.
Нєшка Медзинародни дзень борби процив корупциї (International Anti-Corruption Day).