РУСКИ КЕРЕСТУР – Внєдзелю, 9. марца бул отримани вельки двогодзинови протест у центру валала котри потримали Кулянци хтори до валалу сцигли пешо.
Зоз Кули длугока колона студентох, гражданох и дзецох у котрей було вецей як 200 людзох рушела на 13:30 од моста на керестурскей драги, а до валалу сцигли на 15:30 дзе их дочекали домашнї Керестурци тиж у приблїжним чишлє, алє и зоз тракторами. Вєдно у колони, провадзени зоз полицийскима автами и тракторами ше прешейтали по центер валалу дзе блокирали крижну драгу на два годзини.
За госцох домашнї обезпечели окрипенє у центру, зоз ошвижуюцима напоями и закуску, цо пред тим донирали валалчанє. За наймладших були обдумани рижни бависка и куцик за мальованє, а валалчанє нєпреривно доходзели до центру валала.
Потим шлїдзела формална часц програми 15 ружи за 15 жертви кед школяре и студенти заквачели по єдну ружу ґу каждому мену жертви зоз Желєзнїцкей станїци у Новим Садзе. Потим бешедовала доцентка зоз Филозофского факултету у Новим Садзе др Ана Римар Симунович, а на концу отримани 15 минути цихосци.
Попри тим, була направена и мала вистава фотоґрафийох на котрих приказани проблеми з котрима ше стретаю Керестурци и тото з чим су нєзадовольни, визначени слики вецей валалских будинкох котри запущени, вивоженє шмеца на места дзе то нє предвидзене, як и проблем же валал нє ма воду за пице. На концу, студенти и школяре попораєли центер валалу, а шицко прешло мирно и без инцидетох.
