ДЮРДЬОВ – Националне швето Руснацох у Републики Сербиї почало традицийно, на поладнє 17. януара зоз поставяньом трох заставох: Републики Сериї, Автономней Покраїни Войводини и Руснацох у Републики Сербиї, на три значни будинки у валалє: Општини Жабель, Рускей школи и Културно-уметнїцкого дружтва „Тарас Шевченко”.
У Дружтве була пригодна святочна програма у котрей участвовали єй члени. Пред початок програми послухана гимна Републики Сербиї и шветочна шпиванка Руснацох у Републики Сербиї. Потим на даскельо заводи Олеся Хромиш пречитала историю Руснацох, о тим як ше Руснаци населєли до Войводини, як су нєшка орґанизовани у науки, просвити, дружтве, култури и медийох од Другей шветовей войни, та и о важней статистики и подїйох за Руснацох.
У културно-уметнїцкей програми рецитовали Ленка Станкович и Михайло Пап, а даскельо шпиванки одшпивала Дзивоцка шпивацка ґрупа котру провадзел оркестер.
Присутних привитал координатор подручней канцелариї Националного совиту Рускей националней меншини (НСР) Микола Кухар, котри у сотруднїцтве зоз Управним одбором КУД „Тарас Шевченко” орґанизовал преславу. Присутних поздравела и заменїца предсидателя Општини Жабель Милана Каназир.
На програми було красне число валалчанох, а медзи нїма и парох дюрдьовскей Грекокатолїцкей церкви Рождества Пресвятей Богородици Михаил Холошняй, мастер филозофиї и теолоґиї Страхиня Здравкович, членїца НСР и одборнїца його Одборе за културу Тамара Балоґ, член општинскей ради Општини Жабель задлужени за културу Зоран Пинїч, поверенїк Месней заєднїци Дюрдьов Душко Михелц, секретар Месней заєднїци Дюрдьов Александар Ґолуб, члени Церковного одбору дюрдьовскей грекокатолїцкей церкви и други.
После програми було друженє, коктел и послуженє з домашнїма традицийнима рускима єдлами котри за тоту нагоду пририхтали жени членох и членїци Управного одбору КУД „Тарас Шевченко”.
