КОЦУР – Традицийна Каритасова гуманитарна акция у Коцуре „Дунц шпайз”, котра облапя зберанє помоци у поживи и того цо мож найсц у шпайзу, як и средства за гиґиєну, закончена и назберана помоц унапрямена особом котри у потреби.
Числени валалчанє и того року указали добру дзеку, та назберане значне количество намирнїцох и рижних средствох у тей гуманитарней акциї, а велї помогли и з пеєнєжнима средтсвами.
Пакети облапяли продукти котри вирни, под час тирваня акциї, приношели до Каритасових просторийох, а як гварел координатор коцурского парохиялного Каритасу „Марийов дом” Янко Салонтаї, докупени и намирнїци зоз пенєжу котри назберани у дзвончку у нєдзелї Каритасу.
По Салонтайових словох, то була найуспишнєйша акция до тераз по количеству назбераних и купених продуктох. Пакети однєшени до 37 обисцох, а як визначел, у каждим доме були з радосцу и подзековносцу прияти. Радосни були и тоти котри прияли дарунки, як и тоти котри даровали. Як додал Салонтаї, дакому така помоц вельо значи, гоч нє потирва длуго, алє найвекшу вредносц ма тото чувство же зме нє сами, же маме єдни других, окреме тих дньох пред шветами.
Тиж, волонтере коцурского Каритасу подзелєли и 15 пакецики од святого Миколая дзецом зоз окремнима потребами або одрастаю у чежких обставинох.
Орґанизатор тей гуманитарней акциї „Дунц шпайз” парохиялни Каритас „Марийов дом” Коцур.
