ЧЕРВИНКА/РУСКИ КЕРЕСТУР – Шицки єденацецеро атлетичаре з рускокерестурскей Школи „Петро Кузмяк”, як и їх штафета, освоєли пласман на Окружне змаганє после наступу на Општинским змаганю основних и штреднїх школох у атлетики, хторе вчера, 27. априла отримане у Червинки.
Змагали же школяре-атлетичаре зоз шицких школох у кулскей општини и по освоєних перших и других местох, поєдинєчнои и екипно, атлетичаре керестурскей Школи ше пласовали на Окружне змаганє, хторе 12. мая будзе у Зомборе.
Керестурци ше змагали у катеґорийох 5. и 6. класи, та 7. и 8. класи ОШ, а у скаканю до висока участвовали и два штредньошколки, уж доказана атлетичарка Антония Монар и Андєла Крайнович.
Основношколци ше змагали у седем дисциплинох и у шицких атлетичаре з Керестура освоєли перше, лєбо друге место.
На Окружне змаганє у конкуренциї 5. и 6. класох у своїх дисциплинох ше пласовали Алексей Бики, Дарко Надь и Неманя Ковачевич, у конкуренциї 7. и 8. класох Неманя Стойков, Деян Надь, Алекса Шайтош, Никола Накич, Давид Надь, Тони Пашо, штафета на 400 метери (Давид Надь, Дарко Надь, Деян Надь и Неманя Стойков), як и спомнути штредньошколки. За змаганє их пририхтала професорка физичного у керестурскей Школи Саня Тиркайла.