КУЛА – Пре барз високи дньово температури воздуху, Штаб за позарядово ситуациї општини Кула препоручел гражданом як зменшац ризик од пошлїдкох цеплотней габи, а источашнє апеловал и на рационалне трошенє води зоз водоводней системи.
Як наведзене у сообщеню, явни комунални подприємства на териториї општини Кула окончели шицки потребни пририхтованя за лєтни период, а випоручованє води у тей хвильки стабилне. Заш лєм, пре звекшане трошенє води, гражданє поволани же би воду насампредз хасновали за пице, пририхтованє поживи и отримованє особней и гиґиєни у обисцу.
Апелує ше же би ше воду з водоводу нє хасновало за залїванє польопривредних и желєних поверхносцох, же би ше нє полнєли базени, полївали дражки, тераси и двори, и нє умивали превозки, прето же таке трошенє води може загрожиц порядне випоручованє води за шицких хасновательох под час високих температурох.
По спозореню Републичного гидрометеоролоґийного заводу и Сектора за позарядово ситуациї, гражданом ше совитує же би у периодзе од 10 по 17 годзин нє пребували на отвореним, а окреме же би керовали физични активносци и вежби под час найцеплєйшей часци дня.
Препоручує ше ношиц лєгке облєчиво блядей фарби зоз природних материялох, як и калапи або качкети и окуляри зоз УВ защиту од слунка под час пребуваня на отвореним, а окреме за тих хтори робя на отвореним, хторим ше совитує и части павзи у хладку як и порядне гидрованє.
Гражданом ше препоручує керованє чежкей, масней и присмаченей поживи, зоз частима павзами за воду, швижу овоцу и лєгкима єдлами. Тиж ше препоручує и луфтиранє просторийох и отримованє температури у завартим просторе спод 32 ступнї през дзень, односно спод 24 ступнї през ноц.
Вожачом ше совитує же би под час длугших путованьох правели порядни павзи, як и же би ше у авту на слунку нє охабяло мобилни телефони, упалячи, лїки и други предмети хтори чувствительни на високи температури.