Иґор Фейди меновани за директора „Рускому”

автор яви/мар. фото яви
913 Опатрене

КУЛА − На порядней дзеветнастей схадзки Скупштини општини Кула, котра отримана вчера 17. юлия, прилапени шицки дзевец точки дньового шора, а найвекша часц була пошвецена потвердзованю посланїцких мандатох, менованю директорох установох и подприємствох чий снователь Општина, а розправяне и о Явним подприємстве „Пречисцовач Вербас−Кула” Вербас.

Одборнїки локалного парламенту почали схадзку зоз потвердзованьом мандатох одборнїком Зоранови Рашковичови зоз лїстини Сербска напредна странка Александар Вучич – Сербия победзує и Еми Ловро Вулич зоз лїстини Союз войводянских Мадярох – Иштван Пастор, на одборнїцки места котри остали празни после пременкох до котрих пришло после задзекованя и менованя на други функциї.

Прилапена Одлука о максималним чишлє занятих на нєодредзени час у системи локалней самоуправи за 2017. рок. Обгрунтуюци тоту Одлуку, секретар Скупштини општини Милорад Вуксан визначел же ше вона приноши у складзе зоз Законом о локалней самоуправи зоз хторим предвидзене же у системи максимално може буц 437 занятих на нєодредзени час и же ше зоз тоту одлуку число роботнїкох нє звекшує.

Одборнїки вигласали и нову Одлуку о снованю Явного комуналного подприємства „Пречисцовач Кула–Вербас“ Вербас и зоз назви новоформованого подприємства вируцене слово „заєднїцке“ понеже то було условиє за реґистрованє у Аґенциї за привредни реґистри.

Шлїдуюца точка дньового шору прилапена без розправи, а слово о Одлуки о прилапйованю рочного ликвидацийного звиту Явного подрприємства „Завод за вибудов“ Кула – у ликвидациї, а вигласана и Одлука о финансийним звиту того подриємства зоз станом на дзень 31. децембер 2017. року.

Потим прилапени звити о дїлованю явних подприємствох, чий снователь Општина, за 2017. рок зоз одлуками о розподзельованю заробку, медзи котрима и ЯКП „Руском” з Руского Керестура у котрим, медзи векшима набавками, наведзене купованє глїбинскей пумпи за водовод, моторних косачкох и кантох за шмеце. Потим ше гласало и о Звиту о дїлованю Центру за социялну роботу.

Зоз функцийох окончователя длужносци директора у домох култури Сивец и Червинка и у Центру за социялну роботу розришени Миляна Медоєвич, Миодраґ Ґрубор и Ґордана Вакула, а у ЯКП „Комуналєц“ Кула Дамян Милянич и у ЯКП „Руском“ Руски Керестур Иґор Фейди. Вони такой потим, а на основи Конкурсу и заключеня Мандатно имунитетней комисиї, меновани на функциї директорох у спомнутих установох и подприємствох, на период од штири роки.

ПОВЯЗАНИ ТЕКСТИ