РУСКИ КЕРЕСТУР – На Гиподроме „Леї” вчера, на швето Матку Божу отримани традицийни конїцки обегованя хтори орґанизує домашнї Конїцки клуб „Русин”. Гоч су и нє отримани внєдзелю, на обегованьох було вецей як штиристо нащивительох.
Отримани пейц дринґацки єднозапрагни обегованя змагательох и коньох з вецей войводянских местох, а у єдним змаганю участвовал и Керестурец Янко Планчак зоз своїм Вихором.
На початку отримани дефиле парадних запрагох членох домашнього Клубу, на чолє з наймладшим Борисом Жирошом и його маґарцом Манцеом хтори постал маскота Клубу.
Медзи обегованями за нащивительох були орґанизовани и вецей забавни бависка и за наймладших и за старших, а могло купиц и виробки Здруженя женох „Байка”, покоштовац паприґаш, а по обегованьох и подружиц ше зоз живу музику тамбурашох.
Барз добру орґанизацию тогорочних обегованьох предводзели Юлиян Будински, Желько Папуґа, предсидатель Клубу и Янко Планчак. Потримали ю вельочислени спонзоре, 33 подприємства и 11 поєдинци найвецей з Керестура, алє и з Коцура. Найвекши средства за обегованя обецала Општина Кула, алє ше пенєж ище вше обчекує.