ОДЖАК – Рукометни тренер Славко Надь з Руского Керестура од Спортского союзу Општини Оджак достал припознанє за найлєпшого спортского фаховца за 2016. рок – за резултати хтори посцигнул з двома екипами Женского рукометного клубу (ЖРК) „Деронє” и пионирску екипу ЖРК „Оджак”.
Припознанє ушлїдзело и за його анґажованє на покраїнским уровню, понеже Надь од прешлей єшенї вибрани и до фахового штабу Рукометного союзу Войводини за провадзенє талантованих рукометашкох народзених 2004. року и младших.
Припознаня найлєпшим спортистом, спортским колективом, фаховцох и донатором у спорту Спортского союзу Општини Оджак уручени 17. фебруара на шветочносци у Спортско-дїловним центре Оджак, на хторей присуствовал и предсидатель Спортского Союзу Сербиї Дане Корица и представителє рижних спортских конарох з Покраїни.
Исти дзень отримани и Саям спорту, на хторим участвовали коло 1 000 спортисти – од намладших по сениорох, а у рукометних змаганьох з домашнїма и екипами з Дироню и Бачкого Брестовцу, наступела и Рукометна секция ОШ „Петро Кузмяк” з Руского Керестура, хтору тиж водзи наградзени Славко Надь.