НОВИ САД – З нагоди 50 рокох од снованя „Нових фамелийох”, конара Руху фоколарох, як и 9 рокох од шмерци Кяри Лубик, у „Студию М” у Новим Садзе Рух фоколарох орґанизова програма з назву „Фамелия: жридло надїї и радосци”.
На програми присутсвовали и апостолски нунций у Сербиї архиепископ Лучияно Сурияни, беоґрадски архиепископ монс. Станислав Хочевар, гракокатолїцки священїки о. Владислав Варґа и о. Михайло Малацко, як и римокатолїцки и православни паноцове.
У полней сали „Студия М” були и нашо вирни з Руского Керестура, Нового Саду, Коцура, Кули и Сримскей Митровици, як и вирни з велїх других местох, котри маю искуства и у медзинародних стретнуцох фамелийох.
О фамелиї як жридлу надїї и радосци перше бешедовала малженска пара Месарош, а потим и о. Михайло Малацко, котри гварел же нє лєгко буц у фамелиї, нпр. – буц оцец, алє нє лєгко анї буц паноцец без фамелиї, бо у каждим случаю потребна жертва, нєсебична любов и даванє себе другому, односно треба жиц волю Божу з цалим шерцом.
У першей часци програми замерковане було и шпиванє Ани Римар композициї „Аве Мария”, цо публика барз добре прияла, а єдну музичнуи точку виведли и нашо млади шпиваче и музичаре з Руского Керестура и Нового Саду.
