РУСКИ КЕРЕСТУР – На рускокерестурским теметове вчера, 24. юния, означена 10-рочнїца шмерци Юлияна Рамача Чаму у присустве членох фамелиї, роботнїкох и аматерох Дома култури Руски Керестур.
Юлиян Рамач Чамо, наш визначни музичар, композитор, аранжер, дириґент и музични фаховец ше нєсподзивано упокоєл пред дзешец роками. За собу зохабел богату авторску музичну творчосц и нєсебичну роботу, як у Доме кулури Руски Керестур, дзе бул заняти коло 30 роки, так и у наших музичних фестивалох, насампредз Червеней ружи и Ружовей заградки, у скоро шицких наших КУД-ох, а тиж и у нашим театру.
Праве того року би було 40 роки як почал робиц у Доме култури Руски Керестур, та з тей нагоди ревиялна часц на 65. Червеней ружи будзе пошвецена праве йому и його творчосци, на пияток, 26. юния.