А тераз дацо мотивоване з особного искуства. Тоти дзеци цо нє пошли на „Веселинку”, прето же су малки як мойо власне, остали дома. И ми дзешка ту з нїма – з єдну руку у посцелки, другу на ринґли и трецу у ворду. Тото цо у тим рапшаку нєдостава – музика за дзеци на Ютюб каналу котра би релаксовала цалу ситуацию, бо родичи ди-джеє єдноставно нє сцигую виберац писнї. З оглядом же сербски и так научи з окруженя у котрим жиєме, срчує ше словацки, українски, русийски писнї. Лєм дзепоєдна там по руски.
И то нє лєм зоз музику проблем. Упечаток же нє иснує комплексни приступ ґу дзецинскей култури по руски. Нє як ше прави губаби з блата, алє модерни дзецински писньочки за найменших, анимациї, синхронизовани рисовани, бабкарски представи… Нєдавно єден наш колеґа гварел же кед бул мали, та го нє интересовала руска анахрона култура, бо читал стрипи и патрел науково-фантастични филми. Тераз при ґенерациї 21. вику таки приступ каждодньовосц, гоч то вельо раз нє сцеме щиро припознац.
Тото ше дотика и сучасней рускей култури. Ми можеме сучасносц одруцац же „то нє нашо руске” (як напр. „Водова фест”), алє вец мушиме буц порихтани же традицийни здобутки дзеци можу нє прилапиц, а млади з часом одруциц.
На тему анимираних змистох за дзеци нєдавно зме розплєтли и дебату на Фейсбуку и вишло же идеї – єст, людзох – єст, средства – нє вельо, алє за початок – єст… Хиби орґанизация котра би позберала екипу и тото порушала, а то робота у вецей етапох и на длугши час.
Култура за дзеци и младих по руски, прилагодзена розличним смаком и возростом – то тиж питанє за нову „Националну стратеґию Руснацох 2020–2030” и нїяким концом нє треба допущиц же би вимкло.
Пишце нам – ruske.redaktor@gmail.com