ЗОМБОР – Окружне школске змаганє у атлетики отримане пондзелок 29. априла, на Городским стадиону у Зомборе, а одлични резултати зазначели и керестурски атлетичаре и школяре Основней школи „Петро Кузмякˮ. На Медзиокружне першенство зоз атлетики, хторе будзе отримане 10. мая у Новим Садзе, пласовала ше Валентина Надь.
На окружним змаганю у Зомборе, у дисциплини скаканє до висока, Дюла Фаркаш, школяр 6. класи, завжал 2. место. Фаркаш направел одлични резултат зоз скоком од 150 центиметри цо бул и його особни рекорд.
Теодора Штранґар, школярка 8. класи, зазначела исти резултати, односно прескочела 150 центиметри, цо бул и єй особни рекорд, и завжала тиж 2. место.
Валентина Надь, школярка 6. класи, у скаканю до висока прескочела 135 центиметри зоз чим виборела 1. место, а од другопласованей змагательки скочела за аж 10 центиметри висше. Зоз тим скоком Валентина виборела пласман на Медзиокружне першенство зоз атлетики, хторе будзе отримане 10. мая у Новим Садзе.
Окрем нїх, на змаганю участвовали и други атлетичаре хтори ше змагали у рижних дисциплинох. У дисциплини спринту на 100 метери змагала ше Кристина Сопка, у скаканю до далєка Катарина Дудаш, док кулю руцал Матия Чапко. Шицки тройо змагателє завжали 4. место.
Школярох на змаганє водзела тренер Саня Еделински.
