НОВИ САД – У просторийох Руского културного центру внєдзелю, 23. децембра, отримана Рочна скупштина Спортских бавискох „Яша Баков”.
На схадзки дзевецеро члени Скупштини констатовали же турнирски рок успишно закончени. У прешлим року отримани шеснац екипни и осем поєдинєчни турнири. Першираз у рамикох Бавискох отримане змаганє у вареню хторе отримане штредком юния у Дюрдьове.
На турнирох, по винєшених податкох, участвовали 90 екипи, 118-еро змагателє у поєдинєчней конкуренциї, а вкупно у тим року на турнирох участвовали 382 змагателє.
Кед слово о финансийох, за отримованє турнирох на 27. Спортских бавискох „Яша Баков” у каси було 261 тисяча, а потрошене 207 тисячи динари, цо значи же Бависка на рахунку маю ище коло 50 тисячи. Важне надпомнуц же Национални совит рускей националней меншини, як и потераз, за отримованє бавискох видвоєл 200 тисячи динари. Позитивни салдо на рахунку резултат донацийох и котизациї за єдно змаганє.
Першираз Скупштина Спортских бавискох „Яша Баков” на схадзки мала догварени места дзе буду отримани турнири у идуцим року на 28. Спортских бавискох „Яша Баков”. Перши турнир у билияру будзе отримани у Новим Садзе концом фебруара, лєбо початком марца.
