НОВИ САД -Пияток, 22. мая, у Руским културним центре (РКЦ) традицийно отримана програма „Дзе(нь) младосц(и)”, з тогорочну тему „Жени вс. Хлопи”.
У першей часци програми, хтору отворел Себастиян Няради, отримана промоция двокнїжки „Чаривни нїтки/З молу до дуру” авторох Цецилиї Надь и Михаила Рамача. Двокнїжка вишла як додаток найновшого числа часопису „МАК”, и то була штварта промоция тей кнїжки.
Авторе ше представели зоз своїма писнями, а єден з рецензентох двокнїжки Мирон Джуня похвалєл роботу и виданя „МАК”-у и привитал писанє поезиї младих.
Друга часц програми була пошвецена волонтеризму, та так отримана трибина з назву „Чом волонтеризем?”, на хторей участвовали активни волонтер и лидер Волонтерского кампу у Руским Керестуре Иван Канюх, активна членїца новосадскей младежскей нєвладовей орґанизациї „БалканИДЕА” Соня Гудак и Стеван Самочета спред Здруженя „КУМ” (Куцурско удружење младих – Коцурске здруженє младих), як орґанизатора акциї „Дай и ти свойу руку” у Коцуре.
Трибину водзела Александра Живкович, а млади волонтере потолковали цо значи буц волонтер и прецо то добре, подзелєли свойо искуства з публику и поволали шицких младих котри маю дзеки и часу же би ше приключели волонтерскому руху.
