РУСКИ КЕРЕСТУР – З нагоди 9. мая, Дня побиди над фашизмом, як и 8. мая, Дня примиря у Другей шветовей войни, амбасадор України у Сербиї Олександер Александрович учашнїком Народноошлєбодительней войни (НОВ) з Руского Керестура Якимови Дудашови и Любомирови Варґови вчера придал пригодни дарунки, а Дзень побиди означени и з панахиду за погинутих борцох у керестурскей церкви, пригодну програму у Каритасу и кладзеньом квеца на памятнїк борцом НОВ у центре Керестура. Вєдно з домашнїма, означованє пририхтала Амбасада України у Београдзе и Союз Руснацох Українцох Сербиї.
Панахиду у Катедралней церкви служели парох о. Михайло Малацко и капелан о. Михайло Шанта, а попри борцох-ветеранох и їх фамелийох, на панахиди присуствовали и амбасадор України у Сербиї Олександер Александрович и перши секретар Амбасади Наташа Миркевич (зоз сотруднїками), предсидатель Вивершного одбору Националного совиту Руснацох Желько Ковач, чолїнки Союзу Руснацох Українцох Сербиї Боґдан Виславски и Йоаким Грубеня, предсидатель Церковного одбору Юлиян Фейди и други Керестурци и госци.
По панахиди у просторийох Каритасу на чесц ветераном Амбасада України пририхтала пригодну програму, на хторей амбасадор Александрович подзековал на їх доприношєню у закончуюцих борбох за ошлєбодзенє, вєдно з Червену армию. О тих подїйох бешедовали и парох о. Малацко, Желько Ковач, историчар Сашо Сабадош, а пригодну поезию читал Тарас Чапко з Дюрдьова.
У мено Амбасади України ветераном придате квеце у фарбох українскей застави и пригодни дарунки на чим, як и на тим же на нїх нє забуваю, подзековал Яким Дудаш Мийов.
Присутни и госци у центре Керестура на памятнїк погинутим борцом у Другей шветовей войни положели квеце у мено України, у мено Союзу Руснацох Українцох, у мено ветеранох, а у мано локалней самоуправи квеце положела предсидателька Скупштини општини Кула Снежана Мркаич.
Мркаичова подзековала амбасадорови Александровичови же з тей нагоди пришол и до Керестура и же вєдно з Општину Кула, як мултикултуралним штредком, чуваю памятки на тоту важну историйну подїю.