ПЕТРОВЦИ (ГОРВАТСКА) – През викенд од пиятку, 12. по нєдзелю 14. юний отримана Централна манифестация култури Руснацох Републики Горватскей 51. Петровски дзвон.
Перши дзень манифестациї пияток, 12. юния, на 18:30 гoдзин отворена вистава иконох о. Михайла Йозафата Гардия у петровскей Церкви Покрова Пресвятей Богородици, а у Доме култури отримана промоция нових кнїжкох у виданю Союза Руснацох РГ: Думки з Дунаю ґрупи авторох, Нє берце мачичку за водителя Ивани Бики и Чапаш моєй души Томислава Кетелеша. Програма предлужена зоз Литературно-музичним вечаром на хторим участвовали поетеси и поетове Соня Папуґа, Лубица Гаргай, Агнетка Балатинац, Звонимир Барна и Томислав Кетелеш. У музичней часци наступели Хлопска шпивацка ґрупа КУД Яким Гарди Петровци, Женска шпивацка ґрупа КУД Яким Ґовля Миклошевци и госцуюци фолклорни ансамбл Видуманєц зоз Кужмицох зоз Словацкей, хтори виведли и сценску сличку обряду кресцинох зоз їх краю.
Всоботу, 13. юния, пополадню почала Смотра музичней и фолклорней творчосци Руснацох РГ Петровски дзвон 2026, у амфитеатру на отвореним. Того року, попри домашнього КУД Яким Гарди, свою активну роботу указали и Дружтво Руснак Петровци, КУД Руснацох Осиєк, КУД Яким Ґовля Миклошевци, КД Русинох Винковци, КУД Осиф Костелник Вуковар, Дружтво Руснацох Цвелфериї Раєво Село, КПД Рускиня и Руснак Заґреб, КУД Ади Ендре Кородь, БКУД Лїлян Падеж, и госцуюци ансамбл зоз Словацкей Видуманєц зоз Кузмицох.
Внєдзєлю, предполадньом почала Смотра музичней и фолклорней дзецинскей творчосци Петровци дзвончок 2026. У програми участвовали дзецински ансамбли Руснацох РГ зоз Петровцох, Миклошевцох, ОШ Антуна Бауера Вуковар – ПШ Петровци, Дружтво Руснак Петровци, КУД Селячка слоґа Боґдановци, Дзецинска овода Вуковар 1, подручни обєкт Петровци – дзецинска ґрупа Смоквице, КУД Коло Вуковар.
Тогорочни Петровски дзвон орґанизовани з нагоди 195-рочнїци приселєня Руснацох до Петровцох, 190-рочнїци грекокатолїцкей парохиї у Петровцох, 55-рочнїци часопису Нова думка, 90-рочнїци од шмерци Осифа Костелника и 100-рочнїци першей виведзеней представи у Петровцох.
Орґанизаторе 53. Централней манифестациї култури Русинох РГ Петровски дзвон 2026. Союз Русинох РГ и КУД Яким Гарди Петровци, а под покровительством Совиту за национални меншини РГ и зоз финансийну потримовку Вуковарско-сримскей жупаниї и Општини Боґдановци.
