Концом прешлого року, дотерашнї предсидатель Здруженя спортских рибарох „Коляк” на преширеней схадзки Совиту Месней заєднїци песимистично виявел же робота того здруженя будзе загашена, медзитим, концом януара того року отримана Рочна скупштина, на хторей поведзене же ше роботу предлужи, а за нового предсидателя вибрани Михайло Мичо Пашо.
Насампредз пре финанийни почежкосци, алє и прето же ше нїхто нє сцел прилапиц водзиц Здруженє, Янко Джуджар Цуки, дотерашнї предсидатель Здруженя спортских рибарох „Коляк” з Руского Керестура концом 2015. року нагадовал же Здруженє будзе загашене. Як єден з найзначнєйших проблемох бул, а и надалєй є, же Општина Кула преставала финансовац Здруженє, часточно и Меснa заєднїцa Руски Керестур, пре, як гвари Джуджар, правни формалносци, до хторих, по його думаню, нє мож класц и поровновац риболов, як специфичну спортску обласц.
– Рибарство то специфични спорт, нє мож го финансовац як други спорти хтори маю свойо лиґи од найнїзших по найвисши уровнї. Службени змаганя у риболовстве за дзеци постоя лєм на покраїнским, а за старших лєм на републичним уровню. Ми на нїх нє можеме участвовац, за нас то барз драге пре вельки трошки хтори бизме мали за путованя. Бо, на основи дотацийох яки зме доставали, могли бизме одпутовац на єдно-два урядово змаганє – гвари Янко Джуджар, котри на чоло Здруженя пришол 2006. року и 10 роки бул його предсидатель.
НА СУД ПРЕ ПРАВДАНЄ СРЕДСТВОХ
Пре таку систему змаганьох, пришло и до одредзеного нєспорозуменя з финансиєрами, насампредз з Општину Кула, та вишло же достати пенєж за 2014. рок нє оправдали и страцели право конкуровац за средства за прешли рок.
– Општина нам давала 50 000 динари рочнє за порядну дїялносц, медзитим, вец ше то пременєло и мушело ше правдац участвованє на змаганьох. Як гварим, пре нєможлївосц одходу на лиґашски змаганя, ми участвовали на рижних куп-змаганьох, а орґанизовали зме и свойо клубски змаганя, медзитим, тоти нам нє припознаваю за правданє средствох. Слово о половки цалей рочней дотациї, о 25 000 динарох хтори зме достали у другей половки 2014. рока. Пред тим, за першу половку нам припознали правданє 25 000 динарох за порядну дїялносц, а потрошели зме их за одходи на змаганє рибарох у Миклошевцох, як и и на змаганя у рамикох Спортских бавискох „Яша Баков”. Другу половку дотациї зме тиж правдали з одходом на „Чукияду” у Вербаше, як куп-змаганє, медзитим, тераз гварели же куп-змаганя припознаваю кед их прави Союз риболовцох, а у рибарским спорту Союз куп-змаганя, нє орґанизує, орґанизую их лєм здруженя. Я уплатнїци на цо пенєж потрошени придал, а понеже то нє припознате, поведзене же бизме врацели тоти 25 000. То зме нє могли, бо су потрошени на спомнути змаганя и тераз нас тужа, так же 3. марца мам пойсцсц на суд до Вербасу, та увидзиме як ше то закончи – гвари Джуджар и додава же за простор хтори хасную у Старей школи Општини Кула плаца закупнїну, цо ше тиж нє припознава до трошкох.
Пре становиско же средства нє оправдани, 2015. року нє могли конкуровац за доставанє нових, a у кулскей општини вони таки нє були єдини. Велї спортски клуби хтори нє оправдали достати пенєж, лєбо нє вкупно, без огляду на висину средствох – по новей системи проєктного финансованя мушели их врациц и з тим здобули право конкуровац oзнова. При Општини основана и окремна комисия за провадзенє трошеня средствох и їх правданє, а як за „Руске слово” гварела началнїца Оддзелєня за дружтвени дїялносци Драґана Потпара, єдино кед „Коляк” уплаци пенєж хтори ше вимага – будзе ше го ознова финансовац. Як гварела, тото совитує и шицким другим клубом. Попри з Општини, Здруженє спортских рибарох, як и други керестурски здруженя, пенєж достава и з месного самодприносу, по одлуки Совиту Месней заєднїци. Медзитим, як нам гварел предсидатель Совиту МЗ Владимир Олеяр, понеже Здруженє тиж нє оправдало достати 35 000 динари за 2014. рок, прешлого року средства нє достали. Пре тот формални проблем, 180 000 динари хтори Совит наменєл рибаром, за надкрице (лєтнїковец) цо го на базену правя уж даскельо роки уплацени Спортскому дружтву и з того пенєжу є закрити, а положени и нови драбинки до базену. Як тераз стоя ствари, Здруженє од МЗ вироятно нє достанє пенєж анї того року.
ОКРЕМНИ АКТИВНОСЦИ НА ПЛАНЄ ЕКОЛОҐИЇ
– У децембру 2015, кед зме розподзельовали средства за дотациї здруженьом, предсидатель Здруженя рибарох ми гварел же воно будзе загашене, та зме тоти средства, 35 000, порозподзельовали другим здруженьом – гварел Олеяр, а як гвари Джуджар, концом рока ше так и указовало.
– Мушим припознац же ми остатнї два роки було уж вельо чежше робиц, нє мам вецей сам моци за тото, думам же 10 роки досц. Медзитим, нїхто ше нє сцел прилапиц тей функциї, Управни одбор нє могол найсц чловека котри би водзел Здруженє, по отримованє Рочней скупштини – гварел Янко, котри з тей нагоди наглашує и тото найзначнєйше цо поробене за остатнї 10 роки:
– И пред тим, а и за остатнї 10 роки, рибаре зохабели свой печац у Керестуре, окреме у обласци еколоґиї. Чували зме и чуваме наш беґель и воду и гац. Кажди рок зме правели 4-5 роботни акциї на вичисцованю беґелю, кошеню амброзиї, корова, зберали зме пластики на чамцох по беґелю и боме, вше ше назберало єдeн прикоч рижного пластичного одпаду. Вше зме медзи першима спозорйовали и на заґадзованє беґелю и беґельчикох, на тровенє риби, орґанизовали зме рижни свойо змаганя, змаганя у рамикох СБ „Яша Баков”, три роки зме орґанизовали и Школу за малих рибарох, почало будованє надкрица, як одредзеного рибарского еко-кампу. То наисце красни простор за коло 70 особи нє лєм за нашо потреби, алє є задумани же би служел и за одредзени едукациї дзецох, за школи у природи, и правели зме го даскельо роки, цо з власних средствох, з членарини, цо поштредно зоз средствох МЗ, а у тим нам помогол и Ротари клуб… Вообще, думам же будзе хасновити шицким котри буду орґанизовац даяки активносци у природи – гварел Джуджар.
Рочна скупштина Здруженя рибарох отримана 31. януара, присуствовали на нєй вецей як 90 члени, за предсидателя єдногласно бул предложени Михайло Пашо, чий вибор 2. фебруара потвердзени на Управним одборе. Вшелїяк, новому предсидательови познати почежкосци, насампредз финансийни, так же їх ришованє буду перши наступни задатки.
– Функция и робота одвичательни и основне опредзелєнє отримац Здруженє и предлужиц з роботу. Ище зме ше конкретно нє радзели як наступиме у ришованю того спору з Општину, алє сиґурно так же би ше добре закончело, же би нє ишол даяки подли глас о Здруженю. Будземе о дальшей роботи бешедовац и у Месну заєднїцу, з „Русином”, чий зме и надалєй колективни член, будзем дуркац на шицки дзвери… Дотерашнї проєкти би предлужиц, увесц и дзепоєдни нови, попровадзиц конкурси за проєкти. Увидзиме цо годно и кельо то будзе у моєй моци, понеже мам досц роботи и у своєй Друкарнї, алє наздавам ше же оправдам довириє членох Здруженя – гварел на концу тей розгварки Михайло Мичо Пашо, нови предсидатель Здруженя спортских рибарох „Коляк”.
ДОЗВОЛИ
Як гварел Янко Джуджар, на основи записох Здруженє рибарох у Керестуре постої од 1948. року, а остатнє пререґистрованє було 1999. року, но Здруженє нєпреривно постояло. У нїм од 120 до 200 члени, зависно од цени рибиловней дозволи, а менєй як 125 их нє було. То шицки котри купую дозволи, без дзецох. Членарина у Здруженю 500 динари рочнє, а як гварели бувши и терашнї предсидатель, риболовни дозволи почню предавац док ше их достанє, a теди ше будзе знац и цену.