РУСКИ КЕРЕСТУР – У рамикох Спортских бавискох „Яша Баков” у Руским Керестуре вчера, 12. юния, на „лалицкей писти” на беґелю Дунай-Тиса-Дунай отримане змаганє у лапаню риби на дуґов.
Участвовали аж 11 екипи зоз 33-ома змагателями – три екипи домашнїх (два Здруженя спортских рибарох „Коляк” и єдна СД „Русин”), два екипи з Вербасу (КПД „Карпати” и „Папивинґ”), та по єдна екипа КУД „Тарас Шевченко” з Дюрдьова, Дружтва Руснацох зоз Суботици, КПД „Иван Котляревски” з Бикичу, КПД „Дюра Киш” зоз Шиду, КУД „Петро Кузмяк” з Нового Орахова и Здруженя рибарох „Леняк” з Миклошевцох, з Горватскей.
После штирогодзинового змаганя, у екипней конкуренциї перше место освоєла екипа „Коляк 1” з Руского Керестура, зоз 4,085 кґ влапеней риби, друге екипа „Коляк 2” зоз 2,940 кґ риби, а треце место завжала екипа КПД „Карпати” з Вербасу зоз 2,120 кґ.
У поєдинєчней конкуренциї найуспишнєйши бул Златимир Рамач зоз 1,655 кґ влапеней риби, други Мирко Фекете зоз 1,310 кґ, а треце место завжал Янко Фекете зоз 1,120 кґ влапеней риби, шицки з Руского Керестура.
Награди шветочно уручени у лєтнїковцу Здруженя керестурских рибарох на базену, дзе шицки екипи достали подзекованя, а найуспишнєйши и медалї.