ВЕРБАС – Представнїки коалициї Зєдинєни за побиду Сербиї, на чолє зоз Маринику Тепич и предсидательским кандидатом Здравком Поношом вчера, 23. марца, нащивели Вербас, дзе их на Площи Николи Пашича дочекало вельке число гражданох.
Шицких присутних привитал и подпредсидатель Народней странки Мирослав Алексич, винчовал им на шмелосци, достоїнству и пожадал же би витирвали у борби за нормалну Сербию. З тей нагоди поволал шицких же би зрозумели значносц гласа каждого чловека у Сербиї, и апеловал най кажде пробує потолковац своїм согражданом же од їх гласа завиши будучносц, а, як додал, глас ше нє може мерац анї з литру олєю, цукром, анї з єднократним надополнєньом з котрим ше купує гласи.
Ношителька парламентарней лїстини спомнутей коалициї и подпредсидателька Странки шлєбоди и правди Мариника Тепич визначела же ище на початку єй посланїцкого мандата у Скупштини 2016. року, Александар Вучич як тедишнї премиєр указовал ясни знаки девияциї своєй и своєй политичней странки и зламаня держави котре у медзичаше и запровадзел.
По єй словох, вони нє жича нїкому зле, а то поручели и Александрови Вучичови, котрому жича найлєпше здравє и длуги живот же би могол одвитовац и одслужиц за шицко тото цо гражданом пририхтал.
Тиж додала же з Вербасу походзи и главни „батинаш” Сербскей напредней странки Ґоран Ковачевич волани Ґоранац котри, визначела, за Mилоша Вучевича и Андрея Вучича виплацує гласи за СНС и ламе ноги нєпослухним, а спомла и Срдяна Кружевича и Иґора Бечича як ище два, як гварела, нєславни мена з Вербасу.
Мариника визначела штири фундаменти їх коалициї – врацанє правди, економски патриотизем, чловек на першим месце и живот опрез профиту. Плани коалициї тиж и концентрация и фокус и на домашнїх привреднїкох, як гварела, а нє лєм субвенционованє страних инвеститорох.
Тепичова апеловала на шицких гражданох же би 3. априла гласали за ґенерала Здравка Поноша понеже, як гварела, вон будзе предсидатель за котрого ше нїхто нє будзе ганьбиц.
Присутним симпатизером спомнутей коалициї предсидательски кандидат Здравко Понош гварел же Тепичова и Алексич доказали же тото цо приповедаю то и робя, и же буду прави представнїки народу.
Оглядаюци ше на терашню власц, гварел же свидомо ширя панїку понеже то єдна метода владаня – як дакеди дзелєли людзох на Сербох и нє-Сербох, тераз их дзеля на членох СНС-а и гевтих других. Тото цо ше случує у швеце, додал, причина за забриґованосц, алє нє причина же бизме нє думали о нашей жеми, о нашей будучносци.
Понош апеловал на гражданох же би ше нє бали, нє допущели нїкому же би их дзелєли, и нє препущели нагоду висц на виберанки. По його словох, людзе нє треба же би допущели же би им дахто забил оптимизем, понеже тота держава преходзела и през векши нєщесца як цо актуална власц, а за пар тижнї шицко можлїве премєнїц, лєм зоз єдним заокружованьом клайбаса 3. априла – лєм треба же би верели до себе, вжали судьбу до своїх рукох и одлучели закончиц з нєправду котру роками гражданє жию у Сербиї.
