ЖАБЕЛЬ/ДЮРДЬОВ – Зоз Шветочну академию и додзельованьом наградох вовторок, 8. новембра, на Митра по юлиянским календаре, у голу ОШ „Милош Црнянски” у Жаблю преславени Дзень Општини Жабель. На шветочносци уручени Митрова награда, Митрова грамота и Подзекованя гражданом жабельскей општини, медзи нїма и троїм Дюрдьовчаном.
Програму з гимну Републики Сербиї отворел Хор „Пасторала” зоз Жаблю, а пригодну бешеду отримал предсидатель Општини Жабель Чедомир Божич.
З Дюрдьова Митрову грамоту достали Ана Радишич, вельорочна активистка у музики у КУД „Тарас Шевченко”, котра наградзена за посцигнути резултати у култури и уметносци, а на предкладанє Управного одбору „Шевченка”, и Деян Божич за посцигнути резултати у образованю, котрого предложела Штредня школа „22. октобер” зоз Жаблю. Подзекованє достал Стеван Сич за активносци у спорту, а на предкладанє Конїцкого клубу „Жабель” зоз Жаблю.
У рамикох означованя Дня општини, исти дзень дополадня на памятнїк учашнїком у Першей шветовей войни у центре Жаблю положени венєц.