НОВИ САД – На новосадским Штранду вчера, 25. юлия, почал Тидзень руского язика и култури, хтори у рамикох Манифестациї „Под корунами на Штранду – здравє, спорт, уметносц вареня”тирва по 30. юлий. Тиж буду представени и нашо новини „Руске слово” и часопис за дзеци „Заградка”.
Роботнї з руского язика и култури ше отримує кажди дзень од 19 до 20 годзин, а водзи их докторантка, мастер руского язика Ана Римар. З дзецми робя и аниматоре Маша и Ивица.
Пейц днї, од пондзелку по пияток, дзеци од 5 до 12 роки годни дньово научиц по 10 слова руского язика, а научене будзе преверене на квизу, на соботу, 30. юлия од 18 до 20 годзин. Же би ше квалификовали за квиз, дзеци на роботнї муша присуствовац найменєй три раз, а побиднїки достаню и вредни награди, чийо спонзоре „Кока кола” и „Strauss Adriatic”.
Ученє язика наменєне нє Руснацом, а пре афирмованє меншинских язикох у Новим Садзе, цо циль и цалей манифестациї, хтора почала 11. юлия, и тирва по 20. авґуст.
Фото Вероника Вуячич
Дотераз отримани роботнї з мадярского, а после руского шлїдза роботнї словацкого, румунского и словенацкого язика и култури. За участвованє на язичних роботньох ше мож приявиц по фесйбук боку „Под крошњама на Штранду”‚ а тиж и на самим месце збуваня, у Библиотеки на Штранду.
Того тижня у фокусу и промоция тижньових новинох „Руске слово”, а дзеци годни поопатрац и пречитац и часопис за дзеци „Заградка”.
Орґанизатор манифестиї „Под корунами на Штранду – медиї‚ уметносц и спорт” Городска библиотека Городу Нови Сад, Библиотека на Штранду‚ Центер за розвой меншинских и локалних медийох и Херор Медиа Понт.
Фото Вероника Вуячич