РУСКИ КЕРЕСТУР – У керестурскей парохиї св. оца Миколая, хтора ше ровна по григориянским календаре, на ютре почнє тродньове преславйованє велького християнского швета – Сошедствия Св. Духа – Русадльох. На ютре, на Перши дзень Русадльох будзе и шветочносц Першей св. Причасци.
Швето Сошедствиє Св. Духа ше преславює пейдзешат днї по Пасхи и припомина подїю Зиходзеня св. Духа на апостолох после возношеня воскреснутого Исуса на нєбо, та ше прето тото швето означує и як снованє Христовей Церкви.
У керестурскей Катедралней церкви служби Божо на ютре буду на 8, 10, 11,30 и 19 годзин, а на Служби на пол дванастей 32-ойо школяре другей класи ОШ першираз приму св. Тайну Причасци – Евхаристиї. Нєшка на 17 годзин вони перши раз ступя и до св. Тайни Споведзи.
По традициї, на Други дзень Русадльох (на пондзелок), на 17 годзин з церковней порти руши процесия до Водици, дзе Служба Божа будзе на 19 годзин, на предвечерє Завитного дня.
Завитни дзень у Водици будзе на вовторок, 26. мая, дзе Служба Божа будзе на 10 годзин.