ШИД – Предсидатель Союзу єврейских општинох Сербиї Рубен Фукс вчера одкрил спомин-памятнїк Єврейом зоз Шиду котри страдали у Другей шветовей войни. Памятнїк поставени опрез будинку Културно-образовного центру, дзе дакеди були хижи Єврейох.
Фукс здогаднул же 27. юлия 1942. року до лаґру Аушвиц позберани 71 Євреїн зоз Шиду, 12 ше скрили, а штверо сцекли з гайзибану хтори их вожел до лаґру.
Предсидатель Општини Шид Никола Васич гварел же ше Шидянє оддлужую своїм дакедишнїм согражданом з памятнїком, а их страданє муши буц опомнуце занавше.
Першираз после 72-ох рокох читана молитва на гебрейским и сербским язику, а читал ю рабин Исак Асиел.
Убудуце 27. юлий будзе означовани як Дзень здогадованя, а иницияторе поставяня памятнїка настраданим Єврейом були Радован Сремац и Народна библиотека „Симеон Пищевич”. Инициятиву потримало Здруженє Єврейох з бувшей СФРЮ котри емиґровали до Израелу.
На одкриваню памятнїку присуствовали и чолни функционере локалней самоуправи.
