После пейц дисциплинох Дудаш на другим месце

автор зам/злр; фото танюґ
1.1k Опатрене

АМСТЕРДАМ (ГОЛАНДИЯ) – Наш дзешецбоєц Михаил Дудаш вчера посцигнул одлични резултат на Европским першенстве у Амстердаму, бо после змаганя у перших пейц дисциплинох дзешецйбою забера друге место зоз 4 199 освоєнима бодами, лєм 35 менєй од пешопласованого после першого дня змаганя Олексия Касянова з України, а 47 вецей од трецого Хорхеа Уреня зоз Шпаниї.

У обегованю на 100 м (10,90 секунди) бул треци и освоєл 883 боди, у скаканю до далєка доскочел на 7,44 м и освоєл 920 боди, у руцаню кулї посцигнул свой нови особни рекорд зоз 14,24 м (5 цм вецей як дотераз) и освоєл 743 боди, у скаканю до висока прескочел палїцу на 201 цм и освоєл 813 боди, а у обегованю на 400 м бул други (49,45 сек.) и освоєл 840 боди.

У дзешецбою на Европским першенстве участвую 28 атлетичаре, а змаганє законча нєшка, после ище пейц дисциплинох.

На Европским першенстве у атлетики, хторе почало вчера и тирва по 10. юлий, участвую 11-еро репрезентативци Сербиї и вчера мали одлични дзень, бо попри резултату Михаила Дудаша хтори нагадує даєдну з медальох, до финалних змаганьох ше пласовали Ивана Шпанович и Лазар Антич у скаканю до далєка, а Драґан Томашевич у руцаню диску.

ПОВЯЗАНИ ТЕКСТИ