НОВИ САД – Покраїнски фонд за розвой польопривреди розписал три нови конкурси – за дзвиганє вецейрочних засадох овоци, за набавку новей польопривредней механїзациї и за набавку ройох пчолох, кошнїцох и опреми за пчоларство у 2015. року.
На конкурсу за додзельованє кредитох за дзвиганє вецейрочних засадох овоци мож достац найменєй 1 000, а найвецей 10 000 еври. Мож конкуровац и за кредит за набавку погонскей и приключней механїзациї, за найменєй 1 000, а найвецей 20 000 еври.
На конкурсу за додзельованє кредитох за набавку ройох пчолох, кошнїцох и опреми за пчоларство мож достац найменєй 1 000, а найвецей 5 000 еври. Кредити буду покривац набавку нових кошнїцох у стандарду, новей опреми за пчоларство, та камионох з приколицами хтори реґистрована за пчоларство.
Шицки кредити ше будзе додзельовац з рочну камату од 2 одсто, а конкуровац можу лєм реґистровани ґаздовства на териториї Войводини, найпознєйше по 12. октобер. Вецей информациї о конкурсох мож опатриц на сайту Покраїнского фонду за розвой польопривреди www.fondpolj.vojvodina.gov.rs.