РУСКИ КЕРЕСТУР – Пре ришованє проблему з уписованьом дзецох до руских оддзелєньох у ОШ у Коцуре и Дюрдьове, на инициятиву Одбору за образованє Националного совиту (НС), всоботу, 12. септембра, Совит прилапел дополнєнє Правилнїка о додзельованю стимулацийох и наградох, та ше стимулациї будзе додзельовац и дзецом уписаних до Пририхтуюцей предшколскей програми по руски, а нарок ше упишу до руского оддзелєня першей класи у спомнутих двох местох.
По дополнєним Правилнїку, дзеци уписани до Пририхтуюцей предшколскей програми по руски у предшколских установох у Коцуре и Дюрдьове од тераз як стимулацию буду доставац по 3 000 динари мешачно.
Окрем тей катеґориї, и у тим школским 2015/16. року з 5 000 динари мешачно буду стимуловани школяре уписани до руского оддзелєня першей класи ОШ у Коцуре, потим 10-еро школяре уписани до руского оддзелєня Ґимназиї у Руским Керестуре, та студенти Одсеку за русинистику на Филозофским факултету у новим Садзе.
Виплацованє стимулацийох и наградох ше будзе реґуловац з окремнима контрактами медзи Националним совитом и хаснователями.
Дзепоєдни члени Совиту на схадзки предложели же би НС на одредзени способ, з окремним привитом и пригоднима дарунками, привитал и першокласнїкох у ОШ „Петро Кузмяк” у Руским Керестуре.