РУСКИ КЕРЕСТУР – Основна и штредня школа з домом школярох „Петро Кузмяк” вчера, пред преполну салу з публику у Доме култури, шветочно преславела свой дзень. На програми ше у 15 точкох школяре Школи представели з музично-танєчнима точками, рецитованьом, та интерпретованьом писмених составох, а з нагоди свойого Дня, у голу Школи школяре пририхтали и вецей вистави.
Програму отворел Мишани хор Дому култури з гимну Републики Сербиї „Боже правде” и шветочну шпиванку Руснацох у Сербиї „Браца Русини”, под дириґентством Лидиї Пашо. После привиту шицких присутних, директорка Школи „Петро Кузмяк” Гелена Пашо Павлович у своєй бешеди визначела окремносц школованя у Руским Керестуре и школи по руски, а з тей нагоди начишлєла и успихи школярох Основней и Штреднєй школи у школским 2014/15. року.
На програми участвовали нашо талантовани рецитаторе котри участвовали на Покраїнскей смотри у Сечню – Минеа Югас, Желько Виславски, Микола Еделински и Тимеа Будински, а котрих пририхтали Ивана Дудаш и Мелания Рамач.
Як и звичайно, найвекшу увагу публики прицагла танєчна часц програми, у хторей наступели три дзецински фолклорни ґрупи, возросту од трецей по седму класу, з котрима робели хореоґрафе Ґабриєла Саянкович и Сашо Палєнкаш. Учашнїкох провадзел оркестер Дому култури, з хторим руководзел Юлиян Рамач Чамо.
У музичней часци програми участвовал Дзецински хор ”Шкорванчки”, дзивчатски хор осмих класох, та школяре Школи „Петро Кузмяк” и керестурского Оддзелєня Школи за основне музичне образованє з Кули (ШОМО) – Леон Юрич, Михайло Рацпети, Ивана Планчак и Таня Надь, котри того року поосвойовали високи награди на змаганьих на своїх инструмнетнох, а пририхтали их Мирон Сивч и Милан Суїч.
Цалосну академию школяре пририхтали зоз своїма наставнїками, а у сотруднїцтве з Домом култури и керестурским оддзелєньом ШОМО. Интересантну сценоґрафию прикладну за означованє Дня школи обдумала Александра Медєши, а дзекуюци фамелиї Блаґоєвич, хтора подаровала квеца за тоту намену.
У численей публики були и представителє наших значних институцийох и установох и локалней самоуправи – чолнїки Националного совиту Руснацох, на чолє з предсидательом Славком Рацом, делеґация Општини Кула, на чолє з предсидательку Скупштини општини Снежану Мркаич, директор Заводу за културу войводянских Руснацох Серґей Тамаш, предсидатель Совиту Месней заєднїци Руски Керестур Владимир Олеяр, та делеґациї наших школох з Коцура и Дюрдьова, на чолє з руководительками Славицу Байор и Марию Тртич, як и делеґация кулскей ШОМО, на чолє з директорку Лїляну Барна Никитович.
