БЕОҐРАД – Министерка без портфеля задлужена за демоґрафию и популацийну политику Славица Дюкич Деянович подписала контракти о додзельованю средствох за софинансованє мирох популацийней политики у тим року, за цо Влада Сербиї видвоєла 500 милиони динари безповратних средствох котри будзе хасновац 61 општина у Сербиї, а од того 14 у Войводини.
Видвоєна сума штири раз векша у одношеню на прешли рок, а найвецей пенєжу, коло 306 милиони динари, наменєне за адаптацию и санацию обєктох предшколских установох и бавилїщох.
Средства видвоєни и за починанє власного бизнису младих малженских парох, за злєпшанє условийох роботи на ґинеколоґийних оддзелєньох и за набавку превозкох за потреби патронажних службох.
Будзе ше финансовац и снованє и змоцньованє совитовалїщох за ваготни жени и за репродуктивне здравє, школи родительства и совитовалїща за младих.
Єдна часц средствох видвоєна и за правенє хижох и квартельох за млади малженски пари.