РУСКИ КЕРЕСТУР – У керестурским катедралним храме вчера з Богослуженями преславени Перши дзень Сошедствия Святого Духа – Русадльох, по григориянским календарте, хторе ше у нашей Церкви преславює три днї.
На дзецинскей Служби Божей на пол дванастей 32-ойо школяре другей класи ОШ першираз прияли Святу Причасц, а вечар пред тим першопричащнїки ше висповедали.
Службу Божу служел парох о. Михайло Малацко, а споведал капелан о. Владимир Медєши. Парох у казанї наглашел же кед примаме Причасц, мушиме зрозумиц же нас Исус так люби же ше прейґ тей причасци сце повязац з нами, же бизме були добри людзе, полни любови и же бизме були таки исти як вон.
Першопричашнїки виведли и кратку програм, потим участвовали у процесиї зоз Святима Тайнами, а на концу на памятку на тот дзень достали и спомини.
За тоту духовну подїю дзеци пририхтали вироучительки ш. Вероника, ш. Євсевия, ш. Тарзикия и панїматка Златица Малацко.
Нєшка, на Други дзень Русадльох на 17 годзин з церковней порти руша процесия до Водици, дзе Служба Божа будзе на 19 годзин, на предвечерє Завитного дня.
Завитни дзень у Водици будзе на ютре, 26. мая, дзе Служба Божа будзе на 10 годзин.
