ПЕТРОВЦИ – З интонованьом гимни Републики Горватскей (РГ) и шветочней шпиванки „Браца Русини”, внєдзелю, 7. юния почала главна програма Манифестациї култури Руснацох у Републики Горватскей „Петровски дзвон”, под покровительством Совиту за национални меншини РГ, а Манифестацию привитали предсидателька Союзу Руснацох РГ Дубравка Рашлянин, соборски заступнїк Велько Кайтази, подпредсидателька Совиту за национални меншини РГ Рената Триштер и о. Владимир Седлак.
Програма почала и з гимну „Петровского дзвону 2015”, за хтору текст написал Петровчань Силво Ерделї, а компоновал Витомир Бодянєц. На тогорочним 42. „Дзвонє” одшпивал ю Михайло Голик, з провадзеньом здруженого оркестру членох петровского и осиєцкого КУД, под руководительством Звонка Еделинския.
У штирогодзиновей програми скоро шицки руски дружтва хтори робя у РГ представели вецей руски хореоґрафиї и руски шпиванки, а як госци участвовали аматере горватских дружтвох, як и припаднїки словацкей, ческей и мадярскей националней меншини у Горватскей. Руснацох зоз Сербиї на „Петровскиом дзвонє” представяли аматере з КПД „Дюра Киш” зоз Шиду.
Мож повесц же у Републики Горватскей руски аматеризем достал одредзени оптимизем, хореоґрафиї руских танцох були нови и охабели моцни упечаток на публику, хтора их наградзовала з громкима аплаузами.
На „Петровским дзвонє” внєдзелю присуствовала и делеґация Националного совиту Руснацох зоз Сербиї.
