НОВИ САД – Новинско-видавательна установа „Руске слово“ вчера, праве на дзень кед 15. юния 1945. року вишло перше число новинох „Руске слово“, означела 70 роки виходзеня наших тижньових новинох по руски.
З нагоди ювилею, у „Студию М” отримана шветочна академия, а госци од дакедишнїх и терашнїх руководительох установи, одвичательних редакторох новинох и ношительох нашого националного, културного и духовного живота, мали нагоду чуц же прецо и у якей мири „Руске слово” було значне рускей националней заєднїци у предходних седем деценийох, алє и у наступних рокох.
Як цо у привитних словох гварели предсидатель Националного совиту Руснацох Славко Рац и апостолски еґзарх кир Ґеорґий Джуджар, „Руске слово”, окрем задатку же би информовало своїх читачох, ма и барз значну мисию у очуваню националного идентитету и свидомосци рускей националней заєднїци, насампредз през писане слово, чуванє язика, култури и традициї.
Як задатки, алє и спокуси у терашньосци и будучносци визначене одуперанє асимилаторним процесом, отримованє вязи з младу публику и з Руснацами у других державох.
Ювилей „Руского слова” повинчовала и помоцнїк покраїнского секретара за културу и явне информованє Смиля Максимович, а директорка Установи Мартица Тамаш бешедовала о актуалних пременкох у новинох, хтори обдумани же би ше отримало крочай з медийнима трендами и „Руске” приблїжело ґу читачом.
На одредзени способ, пририхтованє за нєшкайше „Руске слово” почало ище осемдзешатих рокох прешлого вику, а окреме у периодзе окоберских демократских пременкох 2000. року. О своїх искуствох з роботи у „Руским” у тих рокох бешедовали дакедишнї одвичательни редакторе Ирина Гарди Ковачевич, Єлена Перкович и Дюра Винаї, як и перши постоктоберски директор Установи Микола Шанта.
