БЕОҐРАД – У грекокатолїцкей церкви Св. Кирила и Методия у Беоґрадзе, всоботу, 20. децембра пополадню, преславене швето Святого Миколая. Службу Божу служел беоґрадски парох о. Владислав Варґа, а по Служби наймладшим парохияном Миколай подзелєл пакецики.
З нагоди Миколая, на поволанку о. Варґу, медзи нашима Руснацами у Беоґрадзе зоз 40-минутову програму госцовали дзецински ґрупи КУД „Яким Ґовля” з Миклошевцох, з Горватскей, котри одтанцовали два танци, шпивали коляди и руски народни шпиванки и рецитовали пригодни рецитациї.
Представена и дзевята кнїжка – „Жвератко нашей младосци” – учителя у пензиї Дюри Лїкара з Миклошевцох, а понеже автор нє бул присутни, о кнїжки бешедовала проф. Ксения Лїкар мл., котра пречитала и рецензию учительки Мариї Папуґа.
После програми госци присутним подаровали прикладнїки спомнутей кнїжки, та часописох „Нова думка” и „Венчик”.
Нєвелька руска заєднїца у Беоґрадзе сердечно привитала госцох, на чим им подзековала панї Олґица Лендєр Радович, котра госцох з Миклошевцох поводзела и по Беоґрадзе. На госцованю подзековал и о. Владислав Варґа, зоз жаданьом же би ше запровадзене сотруднїцтво предлужело, а на програми присуствовал и перши секретар Амбасади України у Сербиї Владимир Беляєв.
