ҐОСПОДЇНЦИ – На 11. Колониї подобових уметнїкох и 14. Дзецинскей колониї „Стретнуце у Боднарова” у Ґосподїнцох, хтора у орґанизациї Дружтва за руски язик, литературу и културу у голу ОШ „Жарко Зренянин” отримана од пиятку, 24., по недзелю, 26. юлий участвовали 37 особи, медзи нїма єденацецеро дзеци.
Од отвераня Колониї, пияток на 16 годзин, та по єй заверанє, учашнїки намальовали по два малюнки з рижнима технїками на рижних димензийох платна, паперу, лєбо на склу, на шлєбодни теми. Участвовали уметнїки рижних профилох – зоз закончену штредню уметнїцку школу, по мастер академцох, як и уметнїки-аматере з вецей местох – з Вербасу, Нового Саду, Сримскей Каменїци, Коцура, Бачкого Ярку и Ґосподїнцох.
Всоботу учашнїки на Колониї робели од 9 до 21 годзин, а потим ґлумец и поета Ґойко Тодорович зоз Шайкашу виведол даскельо монодрами. Исти вечар, спонзором котри дзечнє помагаю роботу Колониї, уручени малюнки з дотерашнїх подобових стретнуцох. Медзи нїма вецей явни институциї, алє и велї фамилиї з валалу, як цо то Балоґово, Семаново, Иваново, Салонсково, Баратово, Горняково и други.
Внєдзелю на 10,30 г. отворена и Дзецинска подобова колония, на хторей участвовали дзеци основношколского возросту з Дюрдьова, Коцура, Нового Саду, Кули и Ґосподїнцох. Роботню водзел Димитриє Коларевич, просвитни совитнїк Министерства просвити, Школскей управи Нови Сад, за наставни предмет „подобова култура”.
На павзи учашнїки на Колониї нащивели Подобову ґалерию у просторийох Месней заєднїци Ґосподїнци, дзе виложени подобово роботи з прешлорочней Колониї. З тей нагоди госц „Стретнуца у Боднарова”, уметнїк Бранко Орещанин з Новей Пазови, Ґалериї, односно Колониї, подаровал портрет Стевана Боднарова. Орещанин наглашел же у його остатнєй кнїжки Стеван Боднаров заступени медзи сто пейдзешат найвизначнєйшима уметнїками у Войводини.
