НОВИ САД – У виданю НВУ „Руске слово”, а у едициї „Верхи”, тих дньох вишла кнїжка приповедкох „Порвисла” автора Славомира Олеяра, нашого автора зоз Сиверней Америки.
Як визначела рецензентка тей кнїжки Ирина Гарди Ковачевич, юнаки Олеярових приповедкох на своєй животней драги наиходза на препреченя хтори дзекеди пробую ришиц сами, а дзекеди ше операю на другу особу, глєдаюци свойо щесце на способ як можу и як им ше видзи же найлєпше, ношаци зоз собу зайдичку у хторей терха їх походзеня, традициї и власни психофизични капацитети. Инсерти ту, описаних розличних животох раз духовити, раз очековани, а часто и нєочековани, аж и траґични, та таки яки су дати одкриваю вельку правду же ше кажди чловек намага досягнуц тото цо го цагало або дриляло до ситуацийох у яких ше одкриваю його чловечески прикмети, хтори у сущносци причина прецо спокуси на хтори наиходзи ришує праве так. Писатель ше и на тот завод потвердзує як способни влапиц тоту главну нїтку по хторей ше руша док приповеда приповедку, а источасно остава вирни реализму як стилу за хтори ше опредзелєл. Односно, у тим случаю, потвердзує же порвисла, односно сноп до хторого зме повязани одредзує и нашу поєдинєчну моц. На тот завод ше дакеди експлицитнєйше, а даґдзе лєм поштредно, або аж и скрито, вичитує авторово руске походзенє, цо тот рукопис цесно вяже за класичну и найлєпшу актуалну руску литературу.
Славомир Олеяр народзени 11. юлия 1948. року у Дюрдьове. Концом 1993. року селї ше до Торонта до Канади, дзе 1997. року закончує студиї информатики и почина робиц у єдней з водзацих канадских банкох як менаджер за информацийну технолоґию. Тераз жиє у Торонту у Канади и у Сент Петерсбурґу на Флориди (ЗАД).
Нову кнїжку приповедкох мож купиц за 500 динари у представительствох НВУ „Руске слово” – у Новим Садзе на адреси Футожска 2, ІІІ поверх (од 9 по 14 годзин) телефон 021/6613-697. У Руским Керестуре у будинку дакедишнєй Друкарнї на II поверху и на телефон 025/51-00383 або 025/703-311 (од 9 по 14 годзин), як и прейґ колпортерох по наших местох.
Тиж так, шицки рускословски кнїжки мож наручиц и прейґ сайту https://knjizkiporuski.com.