МИКЛОШЕВЦИ – Всоботу и нєдзелю, 29. и 30. августа, у Миклошевцох, у Горватскей, отримана ювилейна, 30. Културна манифестациї „Миклошевци 2015”. Централна програма Манифестациї „Поздрав ровнїни” отримана внєдзелю пополадню, а пред тим положени венци на памятнїк, отворена вистава Етно-збирка миклошевского музею, (за хтору ше ище винаходзи одвитуюци простор), а у грекокатолїцкей церкви Рождества Пресвятей Богородици служена Служба Божа.
Смотра фолклору „Поздрав ровнїни”, на отвореней сцени, почала з гимну Републики Грватскей и шветочну шпиванку Руснацох у Горватскей „Браца Русини”, а участвовали наймладши танєчнїки, Женска шпивацка ґрупа и танєчна ґрупа домашнього КУД „Яким Ґовля”, док ше КУД Русинох з Винковцох представело з двома шпиванками.
КУД „Яким Гарди” з Петровцох участвовал з танєчну и Хлопску шпивацку ґрупу, а з истого места наступели и шпиваче з Дружтва „Руснак”. З єдним танцом ше представело КУД Руснацох з Осєку, Фолклорна секция КУД „Осиф Костелник” з Вуковару одтанцовала два танци, а Мишани хор истого Дружтва одшпивал два шпиванки.
Попри спомнутих руских КУД, на Манифестациї участвовали и КУД „Петефи Шандор” з Чаковцох и КУД „Петефи Шандор” з Ласлова, котри танцовали мадярски танци, та наймладши аматере КУД „Младосц” з Водїнцох и музични квартет з того места.
Програму закончели домашнї танєчнїки, а нєдзельову програму водзели Анамария Мудри и Єлена Бучко.
На програми „Поздрав ровнїни” у Микошевцох привитани и госци, дзепоєдни з нїх и бешедовали присутним – представитель Руснацох у Совиту за национални меншини Републики Горватскей Звонко Костелник, началнїк Општини Томпоєвци Томислав Паненич, предсидатель Координациї радох рускей националней меншини Вуковарско-сримскей жупаниї Борис Бучко, пресидателька Союзу Русинох Горватскей Дубравка Рашлянин, як и представителє Националного совиту (НС) Руснацох зоз Сербиї – заменїк предсидателя НС Йовґен Мудри, предсидатель Вивершного одбору НС Желько Ковач и член НС Сашо Сабадош.
Културну манифестацию „Миклошевци 2015” орґанизовало КУД „Яким Ґовля” з Миклошевцох, под покровительством Совиту за национални меншини Републики Горватскей и зоз сопокровительством Општини Томпоєвци и Союзу Русинох Републики Горватскей.
