КУЛА – У концертней сали Школи за основне музичне образованє з Кули, 19. децембра свой Концерт отримали школяре видзелєного оддзелєня тей Школи з Руского Керестура.
Концерт отримани з нагоди законченя школского полрочя як и наиходзацих крачунско-новорочних шветох. Свою роботу з тей нагоди у 31 точки публики представели школяре од першей по шесту класу хтори уча грац на клавиру, гармоники, и тамбури басприм.
Спомедзи солистох першираз явно наступели Андрей Чизмар на клавире и Аня Арва и Марко Еделински, та Михаела Малацко и Стефан Арва на тамбури басприм. На початку Концерту з пригоднима шпиванками наступел Хор нїзших класох музичней школи, а Концерт завар Камерни состав того оддзелєня.
За наступ школярох пририхтали наставнїки Мирко Преґун, Гелена Гарвильчак и Ладислав Тамаши.