НОВИ САД – Студенти у блокади новосадских факултетох наявели протестне шейтанє нєшка, 24. януара зоз назву Шицко муши стануц, а истого дня наявени и ґенерални штрайк гражданох, преноша новосадски медиї.
Як наявене єдна ґрупа руши зоз кампусу универзитета, опрез Правного факултета, а друга од Медицинского факултета.
Ґрупа студентох зоз кампусу видзе на Булевар цара Лазара дзе на 11:52 годзин одда 15-минутову почесц настрадалим у нєщесцу на Желєзнїцкей станїци у Новим Садзе, потим руша по булевару спрам розрижя зоз Улїцу цара Душана на Лиману.
Студенти Медицинского факултета и Академиї уметносцох 15-минутову почесц оддаю на розкрижю Гайдук Вельковей и Футоґскей улїци. Шейтанє предлужа по Улїци цара Душана дзе их дочекаю студенти зоз кампусу и вєдно по Булевару Европи и по Футоґскей улїци планую блокирац розкрижє при Футоґским пияцу, преноша новосадски портали.
Ґенерални штрайк преглашел Републични синдикат култури, од пондзелку нє робя адвокати и наставнїки, же 24. януар будзе нєроботни дзень наявели и заняти у култури, дзепоєдни установи култури, библиотеки, представнїки нєвладового сектору, погосцителє, биоскопи… Медиї преноша же то нє ґенерални штрайк алє файта гражданскей непослухносци и файта штрайку солидарносци.
Студенти у Беоґрадзе, Новим Садзе, Нишу и других городох предлужели блокади будинкох факултетох и ректоратох. Представнїки власци тримаю же сполнєни шицки вимоги студентох, а студенти на блокадох визначую же анї єдна вимога нє сполнєта у цалосци.